نظام الدراسة فى الفرقة الخامسة

أشكر الأدمن لافادة الطلبة الجداد بس بعد اذنك فيه حاجات اتغيرت (أنا من الدفعة اللي بعدك):
1- محاضرات الأطفال الصبح الساعة 8 و الروند الساعة 10
2- ما بقاش فيه شفوي في الباطنة و الأطفال بقى فيه presentations واحد في الأطفال و 2 في الباطنة العامة
3- بالنسبة لكتب الأطفال ففيها كتاب الدكتور مدكور في النظري و يعتبر كتاب القسم أما العملي فهما كتابين للدكتور ناصر جمال و فيه كتاب mcq للدكتور ناصر جمال برده أو جيبوا الورق المشهور ورق سامر
و ان شاء الله حتكلم في الرد القادم عن كتب الباطنة

- بالنسبة لكتب الباطنة:
*بالنسبة للباطنة الخاصة
ا-القلب (بنقول عليه الكارديو ) فيه كتاب محترم
ب-النفسية و العصبية (النيوروسايكايتري أو النيورو و السيكو) ما لهمش كتب بس ورق المحاضرات كلها بتاعة الأقسام متوفر في مكتبة الشروق
ج-الصدرية (pulmonary أو بنقول عليه الشيست) فيه كتابين واحد نظري و واحد عملي
د-الجلدية و التناسلية (الديرما و STDs & andrology أو بنقول عليهم على بعض مجازا الديرما) ما لهمش كتب بس ورق المحاضرات كلها بتاعة الأقسام متوفر في مكتبة الشروق
ه-الأشعة التشخيصية (بنقول عليها راديولوجي ) بتتذاكر من الباوربوينتات بتاعة القسم و كتاب اسمه conventional radiology
و-التحاليل (clinical pathology) ورق المحاضرات بتاعها موجود كله في مكتبة الشروق
ز-طب المناطق الحارة (tropical) فيه كتاب جديد نزل في القسم فيه كل المحاضرات اللي علينا
*بالنسبة للباطنة العامة: ورق الأقسام ال8 كلها في مكتبة الشروق و فيه طلبة أكبر مني جمعوهم في كتابين اسمهم complete & concise متنظم حلو بس فيه مشكلتين:
المشكلة الأولى ان الطلبة اللي عاملاه و بالتالي بالرغم انه من ورق محاضرات الدكاترة الا انهم مش ملزمين بيه ده غير ان فيه بعض أخطاء صغيرة حتعرفوها طول السنة
المشكلة التانية ان فيه محاضرات بتتغير كل سنة و الكتاب بيبقى محاضرة السنة اللي قبلها و لأن الدكتور عايزنا نذاكر من آجدد مصدر ف حتضطروا تصوروا المحاضرات الجديدة المختلفة بس ربنا يسهل اتحاد الطلبة جمع جزء كبير (ان لم يكن الكل) من المحاضرات المتغيرة و نزلها ف ربنا يسهل و يعملوا كده تاني السنة دي
بالنسبة لكتب الدكتور نادر ف على حسب اللي أعرفه انها حلوة للتحفيظ بس من غير فهم
أما كتب الدكتور صبحي ف اللي أعرفه انه حلو بس في الاسبشيالات(الباطنة الخاصة) و مش كلها كمان
أنا مش قصدي أعقد حد بس الخلاصة:
عايز اللي الدكاترة بيقولوه بالظبط يبقى كتاب complete & concise و تزود اللي يزوده الدكتور و تصور المحاضرات المتغيرة
عايز تحفظ بس تفهم نص نص يبقى كتب د. نادر و برده حتزود عليها
و ان شاء الله في الرد القادم حتكلم على نظام المحاضرات و الروندات في الباطنة

5-بالنسبة لنظام المحاضرات و الروندات:
* بالنسبة للباطنة العامة:
كل قسمين(وحدتين) ماشيين مع بعض بحيث تاخد (في 4 أو 5 أسابيع) روندات و محاضرات القسمين اللي مع بعض:
ا-وحدة أمراض الكلى (الدور الثاني في الطرقة أمام السلم و اجازته الثلاثاء) مع وحدة امراض الشيخوخة (الدور الثاني الطرقة اليسرى و اجازته السبت)
ب-وحدة أمراض الجهاز الهضمي (الدور الثالث في الطرقة أمام السلم و اجازته الأربعاء) مع وحدة أمراض الغدد الصماء (الدور الثالث الطرقة اليسرى و اجازته الأحد)
ج-وحدة السكر و الميتابوليزم (الدور الخامس في الطرقة أمام السلم و اجازته الأحد) مع وحدة الروماتيزم (الدور الخامس الطرقة اليسرى و اجازته الأربعاء)
د-وحدة أمراض الكبد و المرارة و البنكرياس (الدور الرابع أمام السلم و اجازته السبت) مع وحدة أمراض الدم (الدور السادس و اجازته الثلاثاء)
ملحوظة :للأدوار العليا استخدم أسانسير مبنى الجراحة و عدي من الطرقة على يمينك(اللي هي كانت على الشمال في الباطنة ) مع ملاحظة ان باب طرقة الدور التاني بتاع أمراض الكلى مقفول!!
بالنسبة للروند فأرقام الروند الواحد بنتقسم لمجموعتين كل مجموعة بتروح قسم من القسمين اللي مع بعض و بعد نص المدة(أسبوعين أو اسبوعين ونص) المجموعتين بيبدلوا القسمين
أما المحاضرات ف محاضرات القسمين بتتاخد على مدى الشهر يعني المجموعتين اللي في الروند حيحضروا المحاضرات مع بعض
مثال: روند 4 اتقسم ا و ب مجموعة ا حتاخد عملي كلى طول الاسبوع ماعدا يوم الثلاثاء و مجموعة ب حتاخد عملي شيخوخة طزل الاسبوع ماعدا السبت في الاسبوع الأول و التاني بس المجموعتين حيبدأوا محاضرات نظري شيخوخة مع بعض و أول الاسبوع التالت مجموعة ا تبدل و تاخد عملي شيخوخة و مجموعة ب تبدل و تاخد عملي كلى بس المجموعتين حياخدوا محاضرات نظري كلى من أول الاسبوع التالت
الروندات بتتاخد في مبنى الباطنة
الروند رسمي من 9-12 و الحضور الساعة 8 و نص بس فيه دكاترة بتحب تدخل بدري و فيه دكاترة بتتسامح في الغياب لحد 9 و نص مثلا ،في المقابل فيه دكاترة بتاخد الغياب 8 و نص بالظبط و بعدها بتتاخد غياب!!
المحاضرات في مبنى المجمع التعليمي (العيادات الخارجية)
المحاضرات بتبقى يومين في الاسبوع من 12-1 و يومين من 1-2 و يومين مافيش يعني في المثال: السبت و الثلاثاء مافيش محاضرات و الأحد و الأربعاء من 12-1 و الاثنين و الخميس من 1-2
ان شاء الله نكمل نظام المحاضرات و الروندات في الرد القادم

تابع 5-بالنسبة لنظام المحاضرات و الروندات:
دلوقتي نتكلم عن الباطنة الخاصة و دول حقسمهم 2
1- أقسام الباطنة الخاصة الأساسية وهم
-قسم القلب الدور الأول مبنى الباطنة
-قسم النفسية و العصبية متشفى ناريمان
-قسم الصدرية في المبنى المجاور لجامع الكلية أمام مكان ركن السيارات و الجنينة الكبيرة اللي أمام المبنى الأكاديمي سابقا
-قسم الجلدية و التناسلية في المبنى المجاور لجامع الكلية أمام مكان ركن السيارات و الجنينة الكبيرة اللي أمام المبنى الأكاديمي سابقا يعني نفس مكان قسم الصدرية
2- أقسام الباطنة الخاصة الأخرى و هم
-الأشعة التشخيصية
-التحاليل
-طب المناطق الحارة
نبدأ ب
1-الباطنة الخاصة الأساسية
-كل قسمين فيه أخوات برده بمعنى
قسم القلب و العصبية بيدرسوا مع بعض و ح أدي مثال على طول
روند 4 اتقسمت ا و ب ، مجموعة ا حتاخد عملي العصبية الاسبوع الأول و التاني و مجموعة ب حتاخد عملي القلب الاسبوع الأول و التاني و يبدلوا أول الاسبوع التالت
أما المحاضرات حتبقى 3 ايام في الاسبوع قلب و 3 عصبية ( عادة 2 عصبية و 1 نفسية)
المحاضرات النظري بتبقى من الساعة 8-10 في المجمع التعليمي و العملي من 10-12 بحيث:
عملي القلب في قسم القلب الدور الأول مبنى الباطنة
و عملي العصبية في مستشفى ناريمان و تروح مشي أو أسرع مع 3 زمايلك في تاكسي
قسم الجلدية و الصدرية كل واحد فيهم مستقل بذاته بمعنى:
روند 4 مجموعة ا حتاخد عملي الجلدية الساعة 9 و في نفس المكان الساعة 11 تقريبا المحاضرة النظري الاسبوع الأول و التاني،
و مجموعة ب حتاخد عملي الصدرية الساعة 9 و غياب الساعة 8 و نص عادة و الساعة 12 نظري الصدرية في مبنى المجمع التعليمي الاسبوع الأول و التاني
و بعدين المجموعتين يبدلوا مع بعض
2-الباطنة الخاصة الأخرى:
طبعا في الرد السابق كتبت كل وحدة باطنة عامة و معاها يوم الاجازة بتاعها، يوم الاجازة ده للوحدة بس انما الطلبة في اليوم ده بياخدوا عملي واحدة من أقسام الباطنة الخاصة الغير أساسية كالآتي:
*روند 4 مجموعة ا اللي في الباطنة العامة أول شهر حتاخد أول اسبوعين عملي كلى بس لأنه اجازة الثلاثاء ف حتاخد عملي الأشعة يوم الثلاثاء ، و بعدين لما يبدلوا مع مجموعة ب أول الاسبوع التالت و ياخدوا عملي شيخوخة و اجازته السبت ف حيكملوا عملي الأشعة السبت
*و بعدين الشهر التاني في الباطنة العامة بدأوا أول اسبوعين فيه دم و اجازته الثلاثاء ف يبدأوا ياخدوا عملي التحاليل يوم الثلاثاء و أول الاسبوع التالت يبدلوا و ياخدوا كبد و اجازته السبت ف حيكملوا عملي التحاليل السبت
-معنى كده ان الأشعة و التحاليل أخوات بشكل أو بآخر
-بالمناسبة الأشعة عملي بس يعني مافيهاش دروس نظري و مكانها في مبني الوحدة التالتة بجوار مبنى طوارئ الباطنة و السموم
-أما التحاليل ف محاضرات النظري بتاعتها متوزعة طول السنة بحيث:
@في شهر الكلى و الشيخوخة لك محاضرة في تحاليل الكلى
@في شهر الدم و الكبد لك محاضرتين واحدة عن تحاليل الدم و واحدة عن تحاليل الكبد
@في شهر الجهاز الهضمي و الغدد الصماء لك محاضرة عن تحاليل الغدد
@في شهر السكر و الروماتيزم لك محاضرتين واحدة عن تحاليل السكر و واحدة عن تحاليل الروماتيزم
-و محاضرات نظري التحاليل عادة بتبقى الساعة 1 في الأيام اللي محاضراتها من 12-1 أو الأيام اللي مفيهاش محاضرات خالص بس المشكلة عشان تعرفوا يوم كل محاضرة لازم كل شهر تسألوا عليها عند سكيرتارية قسم التحاليل
-و بالنسبة لمكان عملي و نظري التحاليل برده مش ثابتين و لازم تسألوا عليه في سكيرتارية قسم التحاليل (هي كانت الأول في الدور الأول الطرقة اليسرى مبنى الباطنة بس دلوقتي تقريبا بقت الدور الأول المبني الأكاديمي سابقا لأنه كله بقى مبنى التحاليل حاليا)
*و بعدين في الشهر التالت من الباطنة العامة ياخدوا مثلا هضمي أول اسبوعين و اجازته الأربعاء فياخدوا عملي طب المناطق الحارة يوم الأربعاء أول اسبوعين و بعدين أول الاسبوع التالت يبدلوا و ياخدوا صماء و اجازته الأحد ف يكملوا طب المناطق الحارة يوم الأحد من أول الاسبوع التالت
و بعدين في الشهر الرابع من الباطنة العامة ياخدوا سكر أول اسبوعين و اجازته الأحد ف يكملوا ياخدوا طب المناطق الحارة يوم الأحد أول اسبوعين و بعدين أول الاسبوع التالت يبدلوا و ياخدوا روماتيزم و اجازته الأربعاء ف يكملوا ياخدوا طب المناطق الحارة يوم الأربعاء من أول الأسبوع التالت
-محاضرات طب المناطق الحارة متوزعة طول الشهرين اللي بتاخدوا العملي بتاعها فيهم و بتبقى الساعة 1-2 في الأيام اللي محاضراتها من 12-1 أو في الأيام اللي مفيهاش محاضرات
-مكان محاضرات نظري طب المناطق الحارة في مبني المجمع التعليمي
-مكان عملي طب المناطق الحارة: على حسب المجموعة ا أو ب فيه مكانين
عنبر الحريم في مبنى قسم طب المناطق الحارة في ظهر مبنى الباطنة
عنبر الرجال في المبنى المجاور لجامع الكلية أمام مكان ركن السيارات و الجنينة الكبيرة اللي أمام المبنى الأكاديمي سابقا يعني نفس مكان قسم الصدرية و الجلدية و على العموم لو رحتم بدري أول يوم على مبنى قسم المناطق الحارة حيث عنبر الحريم المعيد(ة) حيوصلكم لهناك عشان هي حتة تتوه شوية
و ان شاء الله الرد الجاي حأشرح نظام الشرح في الروندات

6-نظام الشرح في الروند
مبدئيا أحب أصدمكم من دلوقتي أحسن ان المفروض تبقى مخلص كتاب عملي الباطنة بتاع عبد القادر قبل ما تدخل رابعة..ليه بقى؟
لأن الدكاترة معتمدين انه اتشرح في شهرين الميسد بتوع سنة رابعة و مش بيعيدوهم تاني، اللهم الا قلة قليلة
*طيب نظام الشرح ازاي؟
1-بيدخل المعيد ياخد الغياب 8 و نص عادة
2-المعيد بيختار مجموعة من 2 -5 طلبة كل يوم ياخدوا sheet للحالة اللي الدكتور حيناقشها في الدرس
3-بيدخل المعيد من وقت للتاني يدردش معانا عن الحالة و يقولنا على الاختبارات العملية اللي بنعملها عليها و بيخلي بعض الناس أو كلهم(حسب الوقت و نوع الاختبار و تعاون العيان) يعملوه بايديهم
4-بدخل الدكتور الكبير بعد كده و يوقف واحد من اللي أخدوا الشيت بتاع حالة الدرس و يناقشه فيه
في أول كام يوم من الروند الدكتور بيشرح ازاى آخد شيت حالات الروند ده بس بيعتمد ان احنا ذاكرنا الأساسيات اللي في كتاب عبد القادر في سنة رابعة!! هو بس بيقول الزيادات المهم اضافتها على شيت سنة رابعة بالنسبة للقسم ده
بقية الروند بقى بيبقى لمناقشة الحالات المختلفة
*طيب فيه 2-5 طلاب بياخدوا حالة طيب و الطلبة الباقيين؟؟
المفروض يا اما المعيد يوزعهم على حالات برده حتى لو مش حيناقشوها (كتدريب) أو الطلبة يلفوا بنفسهم على العنابر و يشوفوا حالات عشان يدربوا نفسهم على الشيت
الكلام ده في الأطفال و الباطنة
ان شاء الله في الرد الجاي حأشرحلكم طريقة الامتحان

7-نظام الامتحان و توزيعة الدرجات
*بالنسبة للأطفال
أثناء الروند بنعمل presentation ب 20 درجة
و بعدين زي ما قال الأدمن احنا في الاسبوع القبل الأخير في شهرين الأطفال بناخد اجازة و بعدين نيجي الاسبوع الأخير نمتحن عملي ، الفكرة ان كل قسم من أقسام الأطفال الستة بيركز على المواضيع اللي تهمه في الامتحان العملي و حيقولكم ايه المهم تذاكروه ، لكن عامة الامتحان العملي بيبقى في القسم بتاعك في الأطفال في مستشفى الشاطبي و بيخلص في يوم واحد و بيبقى عبارة عن:
-2 short cases كل واحدة عليها 25 درجة بتاخد شيت كامل لهم
-3 OSCE يعني حالات عليها سؤال محدد كل واحدة 10 درجات
-حالة أشعة ب 5 درجات
-حالة تحاليل ب 5 درجات
-حالة IMCI (حتعرفوا يعني ايه لما تاخدوا أطفال) ب 5 درجات
و بعدين كل الناس اللي في روند الأطفال تروح آخر يوم في الأسبوع الأخير الكلية و تمتحن نظري mcq عليه 100 درجة
حكمل نظام الامتحان و توزيعة الدرجات في الرد الجاي

الشكر لله يا دكتورة وآسفة للتأخير كل ده
عموما أعتقد الناس في خامسة دلوقتي عرفوا باقي النظام
وخلاصته
الأطفال كده فاضلها 250 درجة امتحان آخر السنة على ورقتين كل واحدة ب125 درجة متقسمة 75 Short essay و50 MCQ

*بالنسبة للباطنة كانوا موزعين علينا ورق بتوزيعة الدرجات




وآسفة مرة تانية للتأخير